सरकारी स्तरबाट समेत सांस्कृतिक संस्थानलाई अल्पकालीन तथा दीर्घकालीन सोच रणनीति तथा कार्यक्रमहरु ल्याउनुपर्ने देखिन्छ । राष्ट्रको कला संस्कृति तथा परम्पराहरु जोगाउन संरक्षण तथा प्रबद्र्धन गर्न अन्य संघ संस्थाहरु नभएको आजको परिवेशलाई बुझ्दा सरकारले यसलाई सांस्कृतिक फाँटको केन्द्रिय निकायको रुपमा विकास र विस्तार गर्नुपर्दछ । यसबारेमा सरकारले उदार भएर सोच्नुपर्ने देखिन्छ । यसले सम्पन्न गर्ने विभन्न महत्व बोकेका कार्यक्रमहरुमा सरकारले ध्यान दिई यसको औचित्य र आवश्यकतालाई मध्येनजर गर्दै यसबारेमा नयाँ योजना ल्याउनैपर्ने देखिन्छ । यसले आमनागरिकलाई नेपालको कला संस्कृतिको पहिचान गराउनुपर्दछ । यस्ता यावत कुराहरुलाई मध्ये नजर गरी सरकारले यो संस्कृतिक संस्थानको सांस्कृतिक कार्यक्रम तथा गतिविधिहरुको अध्ययन तथा विश्लेषण गरी सरकारको सोच र योजना अनुसार यसै संस्थानलाई समावेश गरी संगीत तथा नाट्य प्रज्ञाप्रतिष्ठानको यथाशीघ्र स्थापना गर्नुपर्दछ । किनभने प्रस्तावित संगीत तथा नाट्य प्रज्ञाप्रतिष्ठान छुट्टै स्थापना गरी सांस्कृतिक संस्थानलाई ओझेलमा पारियो भने यस माथि ठूलो अन्याय गरेको ठहरिनेछ । हुनपनि संगीत तथा नाट्य प्रज्ञाप्रतिष्ठानले गर्ने काम कर्तव्य तथा अधिकारलाई मध्यनजर गर्दा सांस्कृतिक संस्थान राष्ट्रिय नाचघरले गर्ने काम कर्तव्यहरु लगायत थप कामकुराहरु समेत गर्न सक्ने देखिन्छ । त्यस कारण सांस्कृतिक संस्थान छुट्टै राख्ने वा प्रतिष्ठानमा लग्ने भन्ने कुराको निचोड निकाल्नु पर्दा यस्तै प्रकृतिका दुई निकायको गठन गर्नुभन्दा सांस्कृतिक संस्थानलाई सो जिम्मेवारी तोक्दा बढी फलदायी उपलब्धीमूलक र न्योयोचित हुन जान्छ । यसले प्रतिष्ठानले लक्ष्य राखेको कामकाजहरु समेत प्रत्यक्ष तथा अप्रत्यक्ष रुपले गर्ने गरेको महशुस गरिएको छ । यदि संस्थानलाई प्रतिष्ठान बनाउने हो भने यहाँ भएका मानवीय तथा अन्य श्रोतहरु बढी भन्दा बढी उपयोग परिचालन गरी उत्पादनमूलक बनाउन सकिन्छ भन्ने विश्वास गर्न सकिन्छ । साथै सोह्र सालेदेखि अनवरत रुपमा साचालित यस संस्थानको नाचघरलाई वास्तै नगरी यही प्रकृतिको प्रतिष्ठान स्थापना गर्ने हो भने संस्थानलाई अन्यायमा पारेको महशुस गर्न सकिन्छ र पछिका दिनहरुमा प्रतिष्ठानले सम्पादन गर्ने उस्तै कामहरु सम्पादन गर्ने उस्तै प्रकृतिको संस्थानको आवश्यकता नहुन पनि सक्दछ । अनि संस्थान र यसमा कार्यरत कर्मचारीहरुको भविष्य नै अन्यौलग्रस्त नहोला भन्न सिकंदैन । त्यसैले यदि सरकारले संगीत तथा नाट्य प्रज्ञा प्रतिष्ठान स्थानपना गर्ने हो भने यो संस्थानलाई समायोजन गरेर वा यसैलाई नै सो प्रज्ञा प्रतिष्ठान बनाउनुपर्दछ । प्रतिष्ठानमा बदलेर यसलाई अगाडि बढाउने हो भने संस्थानले नयाँ उत्तरदायित्व लिएको महशुस गर्नेछ र घोषित वा अघोषित लक्ष्य तथा उद्देश्य अनुसार यसले आफ्नो कार्यक्रम द्रुत गतिमा साचालन गर्न प्रतिबद्धता जाहेर गर्दछ । यसका लागि सरकारले नयाँ सोच शैली तथा रणनीतिहरु तय गर्न गहिरो गृहकार्य गर्नुपर्ने हुन्छ ।